BNBWeb
Historie

Van Frauger - Robert Heidemann / England

As ik deeij Niederdeutsche Bühne bijtreeden bin, was ik net achttien Jaar old, dat mutt also so um 1950/51 west hebben. Un as ik damals tau't eerste Mal mitspölt hebb (ik weit nei mehr whau dat Stück heiten dee), dar kreeg ik in deeij Börkumer Zeitung so'n allemachtig fürchterliche Kritik, dat ik nooit weer mitmaaken wull. Man Derk Juist see an mi: „Dar must du dij nix bi' denken, bij't neechste Mal waart dat wiss beeter!"

Man mijn Erinnerungen an deij Niederdeutsche Bühne gaan noch vööl wijder t'rüch: Mijn Ollen wassen beide in deeij BNB - mijn Mauder spöölde up deeij Bühne mit, un mijn Vader was meisttied Stöönpaale. Wij harr'n in deeij dartiger Jahren 'n Wohnung in „Haus Rote Erde", oover dat Friseurgeschäft, wat mijn Ollen dar harr'n. - Un wallers kwammen deeij Leeden van deeij BNB bij uns tau proben. Dau harr'n wij dann Derk Juist, Hermann (?) Freckmann, Wilhelm Kruse un sijn Frouw, Anni Risius un noch verskeiden andern bij uns.

Dar was ein besündert Stückje: ik glööv, dat was 'n lüttje Einakter up Hochdüts, un dat beide „Die bunte Weste". Un dar was ein Szene, war mijn Mauder heil fileinig fragen muss: „Und wem gehört diese bunte Weste?" Un Frouw Kruse stellde sück dann in Positur (dat kunn sei alltied gaud!) un bölkte: „Die gehört meinem Mann!!" Ik mutt damals so um 4 Jaar old west weesen, un ik doch, deeij beiden harr'n tatsächlich Ruusche mitnander!

Disse bunte Weste was so'n Smokingweste un d'r wassen lüttje geele un roode un blouwe Stoffblaumen upneiht; dat Ding het noch bit naa de Krieg bij uns in't Vöörkaamer in't Skapp leegen.

In deeij Bericht van deeij BNB in „Ditjes un Datjes" van 1985 steiht in deeij Liste van Stücken uk vöör dat Jaar 1951 „De Strom". Man ik glööv nei, dat deeij BNB dat upführt hett. Mijn Mauder sullde mitspöölen, man sei see, dat deeij Handlung freeijwatt „gewagt und frei" was. Dar sullde 'n harst-naakende Frouw up deeij Bühne weesen. (Spöölbaas Derk Juist harr Gisela Hohl davöör utsöcht, un all deeij Mannlüü wassen d'r allemachtig blijde um!) Man dat Stück waarde dann uppgeeven, um dat - so waarde tauminst seggt - deeij Börkumers leiver wat Lüstiget sein willen.

Moije Tieden hebb ik mitbeleevt bij de BNB. T'was 'n Büllte Aardigkeit darbij, uk wenn wij bij Bühnenproben in't Dörphotel bij Winterdag bit up deeij Knaken verklöömt wassen, denn ol' Gerhard Stindt was van Kniephuusen un Hollfast, un deeij Heizung waarde erst tau de Generalprobe anstellt. Un vöör uns' Stöönpaale Atti Berner in höör lüttje Kabuffke was dat heil besünders slimm.

Un nu wünsch ik all deeij olle un junge Leeden van deeij BNB 'n mooije gesellige Abend un ik hoop, dat deeij BNB noch lange Jaaren wiederbesteiht.

                  Robert Heidemann